Taulantin që ka qenë për pak kohë zëvendësministër i Arsimit kurrë në jetën time nuk e kam takuar, pavarësisht se është shkencëtar ende pa mbushur 20 vite në profesion dhe 40 vite jetë.
Por, ky Taulanti që unë e mbaj mend vetëm për deklaratën e tij se institucioni i rëndësishëm ku ai mbajti detyrën e lartë shtetërore nuk ofronte një makinetë kafeje për të ftuarit, mesa duket është në kërkim të famës së humbur. Sepse, tashmë ka gjetur hapësirë në ekrane dhe si shkencëtar, pa shpikur në fakt asgjë flet për viktima që fshihen nga autoritetet shqiptare të Shëndetësisë.
Ai ka parashikuar si shkencëtar, që viktimat në Shqipëri në 18 prill do ishin 250 deri në 300. Fatmirësisht nuk është kështu. Dhe po kaq fatmirësisht, sistemi shëndetësor nuk ka kaluar në kolaps pavarësisht të gjitha mungesave që mund të kenë mjekët, infermierët, apo çdo pjesëtar i personelit shëndetësor në spitalet Covid dhe jo vetëm.
Unë nuk dua të hyj fare nëse ka apo jo të vërteta në ato që thotë Taulanti. Nëse janë të vërteta dhe institucionet nuk i kanë deklaruar, duhet të jetë vetë ai për të gjeur barrën e provës, pra; të më bindë mua dhe ndoshta shumë të tjerë si unë.
Në të kundërt, të heshtë dhe të mos çorodisë dynjanë me 200 a 300 të vdekur nga koronavirusi. Se mirë halli që na ra dhe nuk e dimë si do ja dalim, por del dhe Taulanti dhe flet për shifra që as në ëndrrat më të këqija nuk do ishin kaq të lehta për t’u treguar.
Taulant! Ti ndoshta ke informacion dhe nëse po, duhet ta dokumentosh e ta dorëzosh në organet kompetente. Nëse nuk e bën duhet të mbash përgjegjësi për përhapje paniku dhe deklarim të informacioneve të rreme dhe sigurisht moskallëzim krimi.
Se që të thuash do të vdesin kaq apo aq nga kjo datë e deri në këtë datë nuk është edhe aq mendim personal në këto kohë, siç mund të rreket ta pohojë ndonjë këtë gjë. E sidomos kur kjo del publikisht nga goja e një shkencëtari, ish-zyrtari, apo qoftë edhe një njeriu të shkolluar dhe që punon me shkencën jashtë kufijve të Shqipërisë.
Kam parë e dëgjuar me vëmendje prej shumë javësh shumë shqiptarë: mjekë, shkencëtarë, profesorë e kërkues shkencorë në thuajse gjysmën e botës. Asnjë nuk parashikoi gjëra të tilla, siç bën ti shkencëtari ynë i ri.
Së fundi, dy këshilla. E para, nëse je vërtet shkencëtar bëj çfarë di dhe na shpik atë vaksinën kundër koronavirusit. Këto parashikimet me shifra të vdekurish, apo të fshehurish nga institucionet shqiptare na i le ne në që nuk kemi gradën tënde, por thjesht jemi të vërtetë.
Dhe së dyti, kërko ndjesë për çfarë ke deklaruar dhe mos u shfaq sikur nuk ka ndodhur asgjë. Do ishte në nderin tënd ta bëje këtë. Mos harro, inatet personale që ke me këta të pushtetit mos i përcill tek njerëzit që janë ngujuar në shtëpi…!
Se dreqi ta hajë famën nuk mund ta kërkosh me fantazi të shfrenuar, por me pjekuri dhe punë të dobishme. Dhe është shumë e thjeshtë. Mjafton të dëgjosh në ekrane ata dhjetëra kolegë të tu shqiptarë, që nga Amerika, Kanadaja, Anglia, Franca apo Gjermania me grada shumë më shumë sesa ajo që mban ti dhe flasin plot modesti.
Leave a Reply