“Politika, emër diplomatik për ligjin e xhunglës”. Kështu e ka përcaktuar politikën një nga burrat e mençur si Eli Kultbertson. Çdo ditë e më shumë shqiptarët po përballen me retorika boshe dhe shpresë të shtirur për familjet të cilat mezi ja dalin të mbyllin fundin e muajit me qindarkat që u kanë mbetur në xhep. Dhe për të mos mjaftuar mjerimi, që ka ardhur si pasojë e klasës politike, e cila është shndërruar si një nga spektaklet më të suksesshme të “humorit”, tani duhet edhe të vuajmë pasojat e deputetëve. Si çdo të enjte në Parlament ndodhin çudira. Duket si mbledhja me prindër, por në kohët moderne, mësuesi dhe nxënësit kanë mundësi të përballen dhe të vetmit që i dëgjojnë janë gazetarët dhe reporterët, të cilët nxitojnë për të bërë lajmin e ditës.
Seanca e sotme parlamentare ishte e tensionuar edhe siç ishte paralajmëruar. Por, gjithë ai tension bëhet për atë grup të vogël njerëzish që janë krimbur nga paratë dhe pushteti po i qelb. Ashtu siç mund të ketë ardh edhe era qelb nga peshku që mbante në dorë deputeti nga radhët e partisë demokratike Ervin Salianji. Ai po që e “kapi peshkun e madh”, dhe është një sukses që ose ja kanë ngecur në dorë, ose i atribuohet pasi u bë “pis me erë peshku.”
Peshku në parlament ishte si një dëshmi që edhe ambasadori i SHBA-ve në vendin tonë Donald Lu ka kërkuar kapjen e kokave të krimit. Sipas Lu-së janari ishte muaji që duhet të jepeshin rezultatet e para. Edhe pse dje faqja e ambasadës kishte publikuar mesazhin nga ambasadori se rezultatet nuk ishin dhënë ende, duke i bërë edhe një herë thirrje: “Politikanëve, policëve dhe prokurorëve: ju u zotuat përpara popullit shqiptar dhe përpara nesh. Ne investuam në burimet për t’ju ndihmuar në luftën kundër krimit të organizuar dhe korrupsionit. Ku janë rezultatet? Populli shqiptar do që t’i jepet fund pandëshkueshmërisë. Komuniteti ndërkombëtar kërkon rezultate konkrete përpara vendimeve të rëndësishme këtë pranverë. Tik-tak. Ambasadori Donald Lu” shkruhej në faqen e ambasadës.
“Peshku i madh” simbolikisht u gjend sot në duart e Salianit, për të treguar kështu se kokat e krimit duhet të kapeshin dhe të ishin vënë para drejtësisë. Dhe përveç kësaj, Salianji bëri një gjest në parlament, duke i treguar gishtin e mesit Kryeministrit të vendit. Një reagim aspak korrekt për kostumin, dhe postin që i është ofruar.
Ndaj po e mbyll me një shprehje të Fridih Niçe: “Politikani e ndan njerëzimin në dy klasa: Në vegla dhe në armiq”. Më mirë të jemi armiq të politikanëve sesa vegla në duart e tyre siç kemi lejuar deri më sot.
Leave a Reply