Kushtetuta jonë i ngjan një rrobe mbushur me andrra prej dy partive kryesore politike. Ajo është prekur pafund në vitet e demokracisë. Orët e fundit kanë qenë deputetët e PD-së dhe LSI-së, që përbëjnë dy partitë kryesore në Opozitë të cilat po mbledhin firmat e nevojshme për të ndryshuar Kushtetutën dhe ligjin në bazë të të cilit zgjidhet Prokurori i Përgjithshëm i vendit. Justifikimi ngjan si gjithnjë i njëjtë dhe përdoret fjalë e stërgjatë anti-kushtetuetshmëria. Së fundmi, amendamenti i propozuar nga opozita kërkon 3/5 e votave në Kuvend dhe Kryeprokurori i përkohshëm t’i nënshtrohet Vetting-ut, derisa të ngrihet KLP. Sërish propozohet një zgjidhje, që duhet lexuar si një krizë tjetër në horizont: ndërprerje e mandatit të kryeprokurores Arta Marku!
Kushtetuta e Republikës së Shqipërisë, në këto 20 vitet e fundit, i janë bërë prekje të shpeshta, si rezultat i kërkesave të vazhdueshme për ta ndryshuar, fakt që kuptohet se vjen si rezultat i kapitalit që kërkojnë të fitojnë forcat politike në vend në kurriz të njëra-tjetrës. Pyetjet e thjeshta që i vinë një njeriu në këtë rast e që s’ka lidhje me konstitucionalizmin janë të tilla: A është kaq e lehtë të merret parasysh ndërrimi i neneve të kushtetutës? Pse partitë politike i japin tagër vetes t’i drejtohen asaj në çdo pak muaj për ndryshim? A na përfaqëson si duhet kushtetuta me të gjitha problematikat tona? Etj., etj.
Dy partitë kryesore politike, që sillen dhe veprojnë si pronare të gjithçkaje në vend, në shumë raste të problemave dhe krizave politike, shumë syresh artificiale, i përvishen hapësirave dhe mundohen të manovrojnë mes klauzolave kushtetuese. Një dekadë më parë, mëtimet për ndërhyrje në Kushtetutë ishin aq të vazhdueshme, sa më 2008 dy elefantët e politikës shqiptare u ulën me një mirëkuptim të thellë për ndërhyrje në Kushtetutë.
Vetëm se ajo që rezultoi e lehtë për dy partitë kryesore me ndryshimet e vitit 2008 ka shkaktuar realisht shumë anomali dhe tashmë ne po e vuajmë këtë ndërmarrje që ka prishur ndarjen e tagreve dhe pavarësinë e pushteteve. Kushtetuta, ky dokument themeltar që duhej ta mbronte parimet bazë të funksionimit të shtetit duket se me ndryshimet që i janë bërë është bërë një dokument ku presupozohet se mund të ndërhyhet në çdo moment.
Paradoksalisht, nëse bëhen vazhdimisht ndryshime, nuk prishet kjo asimetri e madhe që ekziston, ku pakica ka në dorë gjithçka dhe merr vendime, kurse qytetarët kanë vetëm të drejtën të votojnë dhe të mbesin, ashtu si sot, krejt të papërfaqësuar prej menefregizmit të pushtetit. Qytetarët kanë nevojë që me dokumentin themeltar të jenë të përfaqësuar, ndaj politikanëve u kërkohet ta lenë të qetë Kushtetutën, pasi fajin se ka ajo, paçka ashtu e kthyer në një rrobë plot me andrra. (Javanews)
Leave a Reply