Lulzim Basha duket se po kërkon të rindezë “motorët” e të bërit gjoja opozitë, por ama me makinë të fikur. Ai nuk e ka kuptuar akoma se, Partisë Demokratike i janë fikur “motorë”, edhe pse sekretarët e Lulzimit, po bëjnë çdo ditë prova për të rindezur diçka. Për të shpikur “video të reja”, për të provokuar ministra dhe deputetë, për të sulmuar kryeministrin Rama me “fakte të reja, dhe frikën nga Bild”, duke ju rikthyer për të 100 herë “vjedhjes së votave dhe maskave të skaduara”.
Ish-opozita e vjetër që jeton dhe punon vetëm me imazhin e mallkimit dhe shpifjes, që zgjohet dhe ngryset me idenë se “qeverisja na takon ne, dhe jo atyre”, është kthyer në gazi i botës. Duke e ditur se qeveria dhe kryeministri Rama, po dalin fitues edhe mbi pandeminë e coronavirusit falë edhe mbështetjes ndërkombëtare, duke e ditur se pas kësaj faze, nis edhe rrokullisja fatale e saj në skenën e rivalitetit politik, Lulzim Basha me çdo kusht kërkon të rindezë, qoftë edhe me një shkëndi (shpifje) të vetme, “motorët” e fikur.
Ai e di fare mirë se, partia e tij ka humbur gjithçka, dhe jo vetëm votat e të vetëve, por edhe simpatinë dhe mbështetjen e mbështetësve të deridjeshëm. I vetmi “motor” që ka mbetur gjysëmndezur, edhe për pak kohë në atë parti, është ajo e Doktorit, i cili duhet thënë se, edhe në kohë pandemie, nuk e ka harruar se “duhet bërë opozitë ndaj Ramës”. Gjithë Partia Demokratike sot, mbahet në “këmbë” ende nga fuqia e Doktorit, nga urdhërat dhe porositë e tij, ndërkohë që Lulzimi ka nisur dyshimet e para të “besnikërisë” së Ilir Metës.
Angazhimet e fundit të Strazimirit, Palokës, Vokshit, Tabakut apo dhe Pampurit, veçse e kanë zbehur dhe zvetnitur imazhin e asaj partie, që ka mbi 45 ditë që merret me “maskat e skaduara” dhe “tenderat e abuzuara”, ndërkohë që gjithë qeveria Rama, është angazhuar për përballimin e situatës së pandemisë nga coronavirusi. Partia Demokratike, do të ecë kuturu edhe gjatë kësaj pandemie, ashtu sikurse ka ecur edhe para saj. Kjo për faktin se ajo nuk përbën më interes as për shqiptarët, dhe as për ndërkombëtarët. Ndoshta duhej të vinte situata e COVID-19 në Shqipëri, që të zbehej në gjithë kompleksitetin e saj ish-opozita e vjetëruar dhe veçanarisht (ish) Partia Demokratike.
Paaftësia dhe mungesa e fleksibilitetit politik në situata të tilla kaq delikate, shumë shpejt do ta identifikonin atë parti në sytë e shqiptarëve, si një grupim njerësish antihumanë, që dora dhe mëndja, u punon vetëm për prapësi. Ajo që Lulzim Basha e quajti “tërheqje e butë” pas nisjes së pandemisë së coronavirusit, duke qëndruar pak ditë në karantinë totale, shumë shpejt do të transformohej në sulme të paprecedentë me akuza dhe shpifje ndaj kryeministrit, ministrave, mjekëve, dhe specialistëve të shëndetsisë, duke treguar natyrën reale të një partie të imunizuar nga e keqja.
Leave a Reply