Viti 2017 nuk mund të mos cilësohet si një vit i pazakontë, për nga intensiteti dhe natyra e ngjarjeve që e kanë karakterizuar, në hierarkinë e të cilave qëndron aktualiteti politik.
Midis çështjeve të nxehta të politikës, që nga protestat e kërcënimet e opozitës për bojkot zgjedhjesh, ngritja e një çadre në mes të bulevardit, zhvillimi i zgjedhjeve, zgjedhja e presidentit, e deri te zgjedhja e prokurorit të përkohshëm, kryefjala e vitit që po lëmë pas, është reforma në drejtësi.
Mbi fatin e kësaj të fundit do të fokusohen me shumë gjasa energjitë e 2018-s, por që viti i ardhshëm ta gjejë reformën në rrugën e duhur, gjithësecili që është i përfshirë në proces, duhet të reflektojë mbi qasjen dhe sjelljen e tij në raport me reformën e dëshiruar nga mbi 90% të shqiptarëve.
Kjo vlen për politikën, për segmente të saj që u përpoqën ta vonojnë atë duke e kthyer herë në mollë sherri, në objekt mosdakordësish, herë cilësuar si imponim ndërkombëtar, e më keq akoma si një reformë qesharake.
Le të mos harrojmë këtu krizat artificiale të krijuara nga opozita, çadrën e ahengut në mes të bulevardit, nga ku çdo i huaj që insistonte për reformën e drejtësisë shpallej armik dhe ku vettingu konsiderohej një “bullshit”.
Reforma në drejtësi nuk është thjesht një çështje që i shton pikë e kapital partisë socialiste para elektorait të saj. As një çështje të cilën PD ka ekskluzivitetin ta fusë në sirtarët e reformave që nuk i shërbejnë të ardhmes së vendit.
Është reforma që mund ti kthejë njerëzve kapitalin më të madh: besimin! Besimin e humbur nga një sistem i kthyer në pazar prej gjyqtarësh bajraktarë.
“Nuk do të kishte reformë në drejtësi nëse nuk do të ekzistonte aspirata europiane”-tha Kryeministri Edi Rama në një takim me trupin diplomatik në Shqipëri.
Aspirata europiane sot është më afër se kurrë, 2018-ta do të jetë viti i saj pasi pritet çelja e negociatave të anëtarësimit, por kurrkush nuk mund të shkojë i vetëm drejt saj.
Opozita shqiptare duhet jetë pjesë e rikthimit të besimit të qytetarëve shqiptarë, duke përkrahur reformën në drejtësi dhe më e rëndësishmja, duke sjellë një model të ri politik, larg krizave artificiale, larg fushatave baltosëse të vendit, në emër të aspiratës europiane që tek e fundit është edhe aspirata e tyre.
Kush nuk është në gjendje të ndryshojë mendësine dhe sjelljen e tij, në emër të një interesi më të madh se vetja dhe bajraku i përditshëm ku bëhen bashkë i thati me të njomin, tregon që është shumë i vogël për tu bërë mbrojtës i interesit kombëtar!
Kjo do të jetë prova më e madhe për ta, në vitin që po vjen!
Leave a Reply