Islamofobia në troje shqiptare, në thelb, nuk është urrejtje e vetëdijshme apo e painformuar ndaj Islamit. Është në masën më të madhe, një përpëlitje histerike e nacionalizmit folklorik që mban emrin “Ilirida”. Është mania e sharlatanëve të kthjellët dhe të sëmurëve mendorë që kanë infektuar një popull të tërë me premtimin e “bashkimit të trojeve shqiptare”. Këta dhe një ushtri kripto-historianësh që i shoqërojnë, fluturojnë në erë fraza pa lidhje mes tyre si “pellazgët, dardanët, trakët, maqedonasit e lashtë, keltët, dakët…”, me pretendimin se të gjithë këta kanë qenë shqiptarë.
Problemi është që sa herë duan ta çojnë përpara këtë platformë nacionaliste që rreket të kullufisë copa nga shtetet fqinje, u del në foto një xhami, në audio një ezan, dhe ndonjë grua me shami në videon nga rruga. E vërteta është që një pjesë e madhe e popullsisë shqiptare në këto zona identifikohen nga fqinjët por edhe vetë me xhaminë. Ndaj, Islami është në thelb pengesë estetike ndaj ringjalljes së platformës komike iliro-pellazge-dardane-etruske-etj., e njohur edhe si përralla “Ilirida”.
Sepse, sipas optikës së tyre, “edhe Mustafa i bërë synet, edhe ilir, vështirë të jesh. Edhe Hatixhe me shami, edhe pasardhëse e Piros së Epirit (i cili nuk dihet ekzaktësisht se çfarë ka qenë), është e papranueshme. Edhe Enes selef me mjekër, edhe banor i Iliridës… kjo nuk ka ku të rrijë”.
Mbi këtë perceptim sakat që shpërfill çdo koncept e dije bazë mbi kombin, religjionin, ideologjitë etj., ngrihen tri gjëra: (i) Rreziku i terrorizmit me baza nacionaliste, siç po trajtohen ngjarjet e Kumanovës (ku guerilasit shqiptarë atje nuk e heqin Iliridën nga goja); (ii) Përçarja fetare ku disa palo intelektualë do thonë se çdo shqiptar që nuk është i krishterë është antieuropian dhe se të jesh mysliman është tradhti; (iii) Rreziku në rritje nga terrorizmi fetar si pasojë e islamofobisë së gërshetuar me retorikën nacionaliste.
Por ka edhe dy lajme shtesë:
1. Statistikisht Ismailët pjellin më shumë se Gjergjët, dhe janë në ekspansion demografik të pandalshëm.
2. “Ilirida” apo si quhet, NUK ka për të ndodhur kurrë sa kohë në këtë planet ka edhe njerëz të tjerë veç shqiptarëve.
Ps: Ka edhe islamofobë të tjerë të cilët nuk kanë lidhje me folklorizmin, por udhëhiqen nga përfitimi personal dhe/apo për t’u shërbyer interesave specifike në dëm të rendit demokratik. Të tillët janë terroristë socialë që fshihen pas lirisë së fjalës për t’i dhënë shkëndijën detonatorit të terrorizmit të vërtetë.
Leave a Reply