Xhisiela Maloku ka folur dje në Open-in e Eni Vasilit dhe në Opinionin e Blendi Fevziut për historinë e saj me djalin e deputetit Rrahman Rraja.
Rexhepi, është edhe i arrestuar nga prokuroria.
Në panelet e djeshme kishte juristë-gjyqtarë, madje edhe të lartë, analistë, por edhe reporterë të “Kronikës së Zezë”, si dhe aktivistë e filozofë.
Ajo që më ra në sy si reporter, apo gazetar prej vitesh tashmë, është që në të gjithë këtë histori ka një gjë që nuk shkon, pavarësisht vullnetit të shprehur gjithandej dhe përbetimeve për të mbrojtur vajzën, që sipas shumë panelistëve, është e dhunuar, nën kërcënim dhe nuk ka folur tjetër veçse me Omerta-n e saj.
Ndoshta, por deri këtu jemi tek hipotezat.
Po shoh në rrjetet sociale një tifo e disa anëshme se kush prej gazetarëve u tregua hero apo heroinë, por gjëja më e vogël që kemi nevojë sot, janë heronjtë.
Këtu në të gjithë këtë historinë ka një të vërtetë të Madhe.
Ka reporterë, që të paktën nuk kanë bërë DETYRËN. Ju ka ikur lajmi që më 21 korrik.
Po po, ju ka ikur lajmi.
Nuk kanë raportuar një denoncim për një person VIP, pra për të birin e një parlamentari, edhe pse ka ndodhur në mes të Tiranës.
Pak vite më parë, ai reporter që nuk do të jepte këtë lajm, më së paku do të hiqej nga puna për paaftësi nga kryeredaktori apo drejtori i lajmeve.
Por sot gazetarët, në vend që të bëjnë kronikanin, bëjnë psikologun dhe ekspertin mjeko-ligjor, oficerin e policisë kriminale, prokurorin, deri edhe gjykatësin.
Një gazetar, të gjithë këta persona duhet t’i ketë burime, që t’i pyesë për ekspertizë, dhe në fund të shkruajë kronikën e ngjarjes me detaje. Nuk e bënë.
Në vitin 1997, kur bënim mbledhjet e mëngjesit në 08.30 te “Koha Jonë”, Roland Qafoku raportonte nja 40 ngjarje që nga vrasje, plagosje, grabitje etj, që kishin ndodhur gjatë natës, sa me të qeshura me Gim Baçin i thonim nëse kishte fjetur.
Por fakt, Qafoku kishte kaluar në Drejtorinë e Policisë përpara mbledhjes dhe kishte regjistruar në bllokun e tij, ngjarjet e një dite më parë, pra kishte bërë detyrën: Të jepte lajmin.
Megjithatë edhe sot nuk është vonë, të jepet lajmi; i plotë, i saktë, i detajuar dhe natyrisht me referencat e duhura, nga institucionet, ekspertët, por natyrisht edhe prononcimet e politikanëve, meqë përfshihet një deputet.
Kronika të jepet sa më e plotë, e qartë, që t’i përgjigjet sa më shumë pyetjeve që dalin.
Në fund gjykimet i jep publiku e natyrisht organet kompetente si gjykata në fund.
Por edhe vendimi i gjykatës në fund, edhe pse nuk komentohet nga politika, media mund ta bëjë.
Por përpara duhet të bëjë kronikën.
Kush nuk e kapi lajmin atëherë, ka kohë ta bëjë edhe tani. Xhanëm lajmi edhe mund të ikë një herë, apo edhe s’i ke kushtuar vëmendje, por kur rimerret, sërish kronika duhet bërë sa më e plotë dhe sa më e paanshme.
Komentet dhe opinionet pastaj, i bëjnë analistët…por jo vetëm!
A ishte e vërtetë intervista e Xhisielës? Ka një zgjidhje: FBI.
Prokuroria mund t’i kërkojë ndihmë si para disa vitesh me balistikën e plumbave të gardës.
Ka një mekanizëm që quhet Makina e së Vërtetës. Por sërish nuk është i vetmi.
Megjithatë ne gazetarët duhet të bëjmë kronikën e asaj çka ndodhi, me dritë-hijet e tyre. Kaq e thjeshtë.
Leave a Reply