Fatos Salliu/
Dje, ínfoelbasani.al, ishte ndër portalet e para që publikoi rastin e aksidentit që ndodhi në unazën jugore të Elbasanit ku mbeti i lënduar rëndë një qytetar. Në redaksinë tonë mbërritën disa foto dhe informacione për rrethanat e aksidentit. Sipas burimit, një ndihmesë të madhe në shpëtimin e jetës së qytetarit dha deputeti socialist, Taulant Balla, i cili po udhëtonte në atë moment me makinën e tij në këtë segment rrugor.
Burimi informoi se ishte pikërisht deputeti, dhe më pas kalimtarë të tjerë, që i dhanë ndihmën e parë të aksidentuarit. Balla njoftoi menjëherë policinë dhe urgjencën dhe në kohë të shpejtë u morën masa që qytetari të marrë shërbimin e duhur mjekësor. Kaq për rrethanat e aksidentit. Por fill pas kësaj nis “gjullurdia” hamendësimet që lan nam.
Titulli i shkrimit të vënë nga infoelbasani.al ishte: Taulant Balla shpëton jetën e qytetarit në aksident.
Ky titull duket se provokoi mllefin politik të palëve kundërshtare, madje shkoi deri në ekstrem; në dyshimet se këtë aksident e ka shkaktuar deputeti socialist dhe se tani ai bashkë me policinë po fshihnin provat. Dhe për këtë përdorën një portal si infoelbasani. Absurde, meskine dhe e ulët.
Medemek, “qytetari dixhital”, që ndodhej diku aty pas kanalit, informoi Berishën se aksidentin e bëri Balla dhe se tani ai po fshihej. Dhe fap lajmi publikohet në facebook.
Jo më kot sqaruam rrethanat e aksidentit më lart. Ai ndodhi në unazën jugore të Elbasanit, në mes të ditës, në një zonë të populluar dhe ku dëshmitarë ishin dhjetëra qytetarë të tjerë. Për më tepër, zonja që e shkaktoi aksidentin, nuk u largua, vetëm u përfshi në panik pasi kishte edhe një fëmijë të vogël.
Qytetari ishte me fat pasi qëlloi Balla. Sepse ju e dini si funksionojnë gjërat në këtë vend. Shpesh, dhjetëra jetë njerëzish kanë humbur për arsyen e vonesave në dhënien e ndihmës së parë viktimave. Nëse, aksidenti do të njoftohej nga qytetarë të thjeshtë mund të kishte edhe pasoja pikërisht për shkak të neglizhencave. Por sot, telefonatën e Ballës (ashtu si edhe e Saliut dje) ku ta gjeshi.
Por problemi qëndron diku tjetër. Është më tinëzar se kaq. “Qytetari dixhital” nuk u interesua se cili ishte fati i qytetarit të aksidentuar (s’ka gjë ai le të vdesë). Por se mos makina e Ballës ka përplasur qytetarin dhe hajt po e demaskojmë këtë “qerrata”. T’ia themi Berishës këtë se ai e zgjidh. Për fat të keq dhe në mjaft raste, “qytetari dixhital” del bllof.
Të pazotë (dhe frikacakë) që të bëjnë diçka vetë në nivel vendor, jo qytetari dixhital, por të tjerë, i drejtohen Berishës që të luftojë “paudhësitë” e pushtetit të sotëm, kur dihet se gjithçka zgjidhet me votë.
Kishte edhe nga ata “qytetarë dixhitalë” me emra fallco në facebook që nxituan dhe e quajtën infoelbasanin si “medie servile” në këtë rast. Por edhe sikur të mos kish qenë Balla, por një deputet demokrat, vetë Berisha, por edhe një qytetar, ne do të vepronim njësoj. Sepse për ne nuk ka rëndësi kush i shpëtoi jetën qytetarit, i majtë apo i djathtë. Të ngatërrosh politikën me jetën që ta jep Zoti, është mëkat i madh!
Leave a Reply