Gjatë dy ditëve të qëndrimit në Berlin si pjesë e delegacionit të Kryeministrit Edi Rama, por edhe në kontakte të më- parshme, kam krijuar bindjen se në Bundestag-un gjerman ka mbështetje të fortë për zgjerimin e BE-së me vendet e Ballkanit Perëndimor dhe po ashtu për vijimin e procesit për Shqipërinë. Sigurisht, në një prej parlamenteve me serioze të Europës respektohen procedurat dhe u jepet kohë të gjithëve për të marrë pjesë në një debat të rëndë- sishëm si ky.
Prandaj, as e kemi pritur dje dhe as presim që Bundestagu gjerman të thotë “PO!”-në e shumëpritur, pa ezauruar fazat e procesit vendimmarrës. Sigurisht që ka edhe deputetë që janë kundër, ndër 698 anëtarë të Bundestagut. Për shembull, deputetët e AFD-së janë kundër BE-së në tërësi. Po ashtu ka tek-tuk edhe deputetë të koalicionit qeverisës që janë shprehur qartë, kundër apo pro qysh tani. Një zë (deri tani i vetëm) kundër brenda CDU-së, është edhe deputeti Gunther Krischbaum, i cili, në fakt, e ka pritur me shumë respekt Kryeministrin dhe delegacionin tonë dhe e ka drejtuar seancën me të gjithë korrektesën që karakterizon Bundestagun.
Por ka qenë po ashtu e qartë nga një ndërhyrje e tij shumë e shkurtër në fund (si dhe nga çfarë ka thënë më parë e më pas publikisht) që zoti Krischbaum beson më shumë përrallat e Lulzim Bashës, sesa Raportin e Progresit të Komisionit Europian! Për këtë, ne nuk mund t’i vëmë asnjë faj deputetit gjerman, përderisa shejtanin në barkun e tij e kanë futur kolegët tanë opozitarë nën drejtimin e Lulëzim Bashës… i cili, ndryshe nga çfarë ka propaganduar këtu kur ndodhi ajo që nuk donte, pra, rekomandimi pozitiv, atje ka lënë kokrrën e namit me të zezat që ka thënë për Shqipërinë!
Megjithatë, unë jam kthyer nga Gjermania me bindjen se Shqipëria ka një shumicë të mjaftueshme mbështetëse ndër 698 anëtarët e Bundestagut dhe kjo është gjëja më e rëndësishme. Shqipëria ka te Kancelarja Angela Merkel një simbol të besimit tonë tek Europa, duke e shndërruar po ashtu Kancelaren në një simbol të simpatisë së popullit shqiptar për popullin gjerman. Pse jo, ndër vite tashmë të njëjtë me simpatinë për “Die mannschaft”.
Leave a Reply