Na fal Florenc! Sot të vdiqëm, me apo pa dashje. Të gjithë ne që kërkonim shpëtimin tënd, sot të bëmë të vdekur. Të gjithë ne që luftuam duke u lutur kur shihnim videon tënde tek dergjeshe në spital, në pamundësi për të të qëndruar pranë thonim: “Shpëtoje o Zot”. Ne rrënqetheshim për ato shenja që kishe në trup. Ato më të dukshmet në qafë e duar, ishin më të tmerrshme se në filmat horror.
Edhe pse kështu, ne prapë të vdiqëm sot Florenc. Për të disatën herë. Në pamundësi për të të qëndruar pranë, mediat shkruajtën shumë sot për ty. Mbase ti nuk e di. Po, edhe unë shkruajta si kolegët e mi për gjendjen tënde. Më fal!
Shkruajtëm edhe për vizitën e babait tënd në Marsejë, që sipas tij e kishin pritur me këmbët e para. Babai është aty, mbase ti e dëgjon, mbase jo. Të gjithë jemi me sy nga Marseja. Për asnjë event botëror por, për të ditur gjendjen tënde.
Të gjithë mësuam Facebook-un tënd dhe aty merrnim foto shumë të veçanta për të mos pasur dublikime fotosh. Të gjithë ne, sot bëmë një gabim që mbase ti nuk do na e falësh kurrë! Dhe askush nuk do të na falte. Sot shkruajtëm lajmin tënd të vdekjes. Fatkeqësisht përveç vdekjes klinike, ne të dhamë goditjen e fundit. Madje arritëm deri aty sa thamë se “Babai yt ka firmosur të të hiqen tubat dhe ti të prehesh i qetë”.
Na fal Florenc, që nuk na shkoi në mendje të pyesnim motrën tënde në facebook se si është gjendja jote shëndetësore, dhe mbi të gjitha a janë hequr apo jo tubat. Jo nuk pyetëm.
Ti na vërtetove sot që ne jemi dështak. Që jemi të lodhur. Që nuk dimë të punojmë. Që merremi me thashetheme dhe lajmin e vërtet nuk e njohim. Ti na e mësove këtë edhe pse mbase nuk do e kuptosh kurrë.
Na fal Florenc që të vdiqëm kur ti lufton me rrahjen më të dobët të zemrës të rikthehesh i fortë siç dukesh. Ti mbase lutesh që gjithçka ta kthesh pas.
Ne, që sot të vdiqëm urojmë të shpëtosh! /AlpeNews.al
Leave a Reply