Kolegji i Posaçëm i Apelimit ka shkarkuar nga detyra gjyqtarin Besnik Muçi, që Presidenti Ilir Meta e dekretoi për në Gjykatën Kushtetuese.
“Besnik Muçi ka deklarim të pamjaftueshëm për apartamentin 57 m2 dhe kredive te marra tek te afërmit, babai, xhaxhai, vëllai dhe motra. Është në kushtet e deklarimit të pamjaftueshëm të pasurisë. Nuk deklaroi saktësisht edhe pasurinë tokë bujqësore në Pogradec. Provat e administruara konsiderohen se janë të mjaftueshme, prandaj Besnik Muçi nuk mund të gëzojë besimin e publikut për të qëndruar në detyrë.”, ishte argumenti i KPA për shkarkimin e Muçit, duke e nxjerrë përfundimisht nga sistemi si shumë të tjerë përpara tij, të cilët kishin fshehur pasurinë, kishin papastërti të figurës apo mungesë profesionalizmi, ose të gjitha bashkë.
Por, pas vendimit, Muçi i ka ‘habitur’ të gjithë kur është shprehur se nuk largohet nga Gjykata Kushtetuese dhe se nuk e njeh vendimin e Vettingut. Absurdi i qëndrimit të tij si njeri i ligjit mesa duket lidhet me luftën që Ilir Meta po bën me SHBA-BE kundër reformës në drejtësi, por nuk mbaron me kaq.
Sipas logjikës së Muçit, i bie që Shqipëria të ketë anëtar të Gjykatës Kushtetuese (më tej edhe të SPAK e BKH) njerëz që janë shkarkuar nga Vettingu për pasuri të fshehura, lidhje me kriminelë apo të paaftë profesionalisht, të cilët nuk duhet të njohin reformën në drejtësi duke vazhduar kështu të bëjnë atë që kanë bërë këto 30 vjet me drejtësinë.
Kjo në fakt është fiks ajo që Ilir Meta, Sali Berisha me kompani, duan. Bllokimi i reformës në drejtësi ose kapja e saj për t’i shpëtuar të shkuarës së tyre është beteja që po luhet nën rrogoz, duke shpallur armiq edhe SHBA-BE. E në këtë betejë ‘te vjetrit’ e politikës që kanë bërë ç’kanë dashur me këtë vend, kanë përfshirë edhe gjyqtarë e prokurorë që i kishin emëruar vetë dje dhe sot i përdorin për të shantazhuar dhe bllokuar reformimin e drejtësisë.
Logjika që çdokush që është shkarkuar nga Vettingu mund të vazhdojë detyrën në organet e drejtësisë është në fakt logjika e zhbërjes së reformës në drejtësi. Pavarsisht hallit që Ilir Meta ka me Gjykatën Kushtetuese e cila sapo të krijohet do të vendosë për fatin e tij, logjika e zhbërjes së reformës në drejtësi dukshëm është e papranueshme nga SHBA-BE dhe shqiptarët. Ndaj çdo lëvizje e Metës në këtë logjikë veçsa tregon hallin e tij të madh, por nuk duket se ka gjasa t’i japë atij rezultatet që kërkon.
Leave a Reply