Nga Endri Kajsiu/
Është kthyer në qesharake situata politike në Tiranë, ku edhe në fund të vitit opozita nga mungesa e ideve apo nga këshillimi i keq siç ndodh rëndom (e siç e ka konfirmuar edhe lideri historik i PD, Sali Berisha pas zgjedhjeve të 2017-ës), ditën e sotme ka dalë në protestë nën emrin dhe ‘logon’ e emigrantëve.
Ajo që është qesharake në gjithë historinë e protestës së opozitës sot, ku cilido që ka parë të pranishmit në turmë e ka kuptuar se kush proteston, lidhet sërish më studentët dhe protestën e tyre.
Sot, ‘emigrantët’ që kishin dalë në prag feste për të protestuar, në fakt nuk kishin dalë në shesh për të protestuar vetëm kundër Edi Ramës, por edhe kundër studentëve. Protesta e sotme ishte si një konferencë shtypi e opozitës, ku brohoritej ‘’qeveri hajdute, Rama ik’’. E këtë e bënin pasi kryeministri Rama më herët në Asamblenë e PS-së tha ndër të tjera se studentët nuk kërkuan asnjëherë largimin e tij apo të qeverisë, por kishin vetëm shqetësimet e tyre të drejta.
Si për t’iu përgjigjur Ramës, por edhe si për t’iu thënë studentëve që nuk artikuluan asgjë kundër qeverisë, opozita sot ngriti një duzinë njerëzish nën flamurin e ‘emigrantëve’ dhe nxorri më në fund dufin e saj duke brohoritur “ Rama ik’’, duke e bërë edhe njëherë në fund të vitit të duket qesharake përballë qytetarëve.
Kjo mënyrë komunikimi që opozita ka zgjedhur, duke iu përgjigjur Ramës me protesta të inskenuara si jo të sajat nga njëra anë dhe duke kërkuar ikjen e Ramës nën emrin ë ‘emigrantëve’ është më së paku qesharake për një opozitë. E cila tregon jo vetëm që nuk është serioze, por është edhe e paaftë për të patur një alternativë qeverisëse përveç përdorimit të të tjerëve, për të mundur kundërshtarin e saj.
Kjo strategji komunikimi ka treguar se jo vetëm që nuk ngjit në opinion publik, por përkundrazi, ka rritur mosbesimin ndaj opozitës e cila në çdo protestë ku ka hyrë, e ka vrarë atë, me përjashtim të asaj të armëve kimike dhe asaj të studentëve, që shpëtuan dhe u zgjidhën në favor të protestuesve.
Leave a Reply