EDUARD ZALOSHNJA/ Zgjedhjet në Bashkinë Tiranë, si ndeshje derbi…

Po të huazojmë një metaforë nga bota e futbollit, zgjedhjet në Bashkinë Tiranë janë ekuivalenti i një ndeshje derbi kryeqytetase. Ndeshjet nëpër rrethe kanë secila rëndësinë e vet në kampionatin shqiptar, por derbi kryeqytetas tërheq gjithnjë vëmendje të veçantë në opinionin futbollistik. Ashtu sikurse gara bashkiake e kryeqytetit në opinionin politik…

“Derbi” i fundit elektoral kryeqytetas me stadium të mbushur plot e përplot u luajt më 8 maj 2011, kur pothuaj 85% e zgjedhësve kryeqytetas me banim këtu morën pjesë në to. Dhe ajo garë u mbyll me fotofinish, deri në milimetrat e fundit të saj.

Por pas asaj gare të paharrueshme, “stadiumi elektoral” i kryeqytetit nuk është mbushur më plot e përplot…

Kështu, më 2015, vetëm 65% e zgjedhësve kryeqytetas me banim këtu morën pjesë në zgjedhje. Dhe shkallë të pambushura në “stadiumin elektoral” kryeqytetas kishin tribunat e opozitës – përkrahësit socialistë i mbushën pothuaj plot tribunat e tyre. Si rezultat, Erion Veliaj i PS-së mori 44 mijë vota më shumë se Halim Kosova i PD-së.

Më 2019, vetëm 34% e zgjedhësve kryeqytetas me banim këtu morën pjesë në zgjedhje. Por kjo përqindje tejet e ulët ishte pasojë e bojkotimit idiot të zgjedhjeve nga opozita. Sidoqoftë, përkrahësit socialistë i mbushën pothuaj plot tribunat e tyre. Si rezultat, Erion Veliaj i PS-së mori pothuaj 155 mijë vota.

Më 2023, vetëm 60% e zgjedhësve kryeqytetas me banim këtu morën pjesë në zgjedhje. Dhe shkallë të pambushura në “stadiumin elektoral” kryeqytetas kishin tribunat e opozitës – përkrahësit socialistë i mbushën pothuaj plot tribunat e tyre. Si rezultat, Erion Veliaj i PS-së mori pothuaj 60 mijë vota më shumë se Belind Këlliçi i PD-së.

Zgjedhjet e radhës në Tiranë nuk dihet se kur do të zhvillohen (varet nga vendimi që do të marrë Gjykata Kushtetuese më 31 tetor), por në qoftë se do të ishin zhvilluar sot, vetëm 57% e zgjedhësve kryeqytetas me banim këtu do të merrnin pjesë. Kështu rezultoi nga sondazhi i përjavshëm “Zëri i Shqiptarëve”, që kryej për ABC NEWS.

Dhe shkallë të pambushura në “stadiumin elektoral” kryeqytetas kanë tribunat e opozitës – përkrahësit socialistë i mbushin pothuaj plot tribunat e tyre. Si rezultat, Ogerta Manastrilu mund të marrë plot 40 mijë vota më shumë se Florjan Binaj i PD-së, në qoftë se zgjedhjet zhvillohen sot…