Ka një pyetje thelbësore që nuk e bën kush në këto kohë në Shqipëri ose që nuk bëhet publikisht së paku. Këtë pyetje duhet t’ia bëjnë vetes në rradhë të parë ata që qeverisin e më pas të gjithë ata që bëjnë politikë në përgjithësi. Cila është pyetja?
Si ka mundësi që çdo ditë e më shumë thellohet hendeku ndërmjet një grupi të vogël njerëzish që pasurohet gjithnjë e më shumë e një grupi tjetër shumë të madh që mbetet i varfër ose varfërohet gjithnjë e më shumë? Dhe si mund të dilet nga kjo situatë?
Sfida e madhe e varfërisë së shqiptarëve, sidomos ajo larg qëndrave, kjo po që duhet të na lërë të gjithëve pa gjumë. Kjo situatë, dhe vetëm kjo, ka sjellë që ndaj politikës dhe përpjekjeve të saj për të sjellë ligjshmërinë nëpërmjet reformës në drejtësi, të mbahet një qëndrim dyshues e mosbesues. Në fakt qoftë politika e qoftë diplomacia, që orvatet t’i vijë në ndihmë të parës, kam përshtypjen se kanë një perceptim të vakët të asaj çka ndodh në jetën e përditshme të shqiptarëve të varfër.
Këtë perceptim e kanë të vakët e pothuaj inekzistues edhe analistët që komentojnë aktualitetin nëpër studio televizive apo nëpër faqe gazetash.
Ja pse unë mendoj që shumë tema të aktualitetit, qoftë edhe tema me rëndësi, janë një lloj lënde dehëse apo një lloj zhurmuesi për të harruar apo mos dëgjuar situatën varfëruese dhe të varfër të pjesës më të madhe të shqiptarëve.
Leave a Reply