Nga Bledi Lumani
Kur Wikileaks nxorri para disa vitesh listën e personave që raportonin në Ambasadën e SHBA në Tiranë, pati habi.
Një koleg tha me humor se “ne mendonim që spiun ishte vetëm filani (bëhet fjalë për një gazetar), po këta qenkan të gjithë”.
Atëhere kjo gjë nuk u konsiderua skandal (edhe pse në Ambasadë raportonin dhjetëra deputetë), pasi SHBA konsiderohet si një vend mik, që na do të mirën.
Ndryshe qendron puna me Greqinë, e cila paguan politikanë e gazetarë në Shqipëri për politikat e saj, kundër interesave të Shqipërisë.
Dhe nuk ka nevojë të përmenden emra, pasi në shumicë ata dihen.
Fjala vjen, në Gjirokastër, në masë të madhe, ata që jetojnë atje, e dinë me emër e mbiemër se kush punon për interesat e Greqisë dhe paguhet nga Athina.
E njëjta gjë mund të thuhet për Sarandën, Himarën, Përmetin etj, që kanë lidhje më të afërta me Greqinë dhe ku propaganda greke është më e fortë dhe më aktive.
Ajo që ka shkaktuar irritim, është fakti se këto financime janë “zyrtarizuar” për herë të parë nga Athina, e cila ka pranuar se ka një fond për të paguar “njerëzit e saj” në Shqipëri.
Publikimi i listave me emra pastaj, e ka bërë debatin qesharak, pasi aty janë përfshirë të gjithë figurat publike shqiptare, duke përfshirë madje edhe aktorë e këngëtarë.
Irritimi i të përmendurve në këtë listë, është edhe më qesharak.
Le të ndalemi p.sh tek Shpëtim Idrizi.
Unë s’e besoj asfare se ai merr para nga grekët. Nuk ka nevojë!
Ka bërë aq shumë pazare politike me partinë e çamëve gjatë këtyre viteve, duke kaluar herë me Metën, herë me Berishën e herë me Ramën, sa nuk ka nevojë për paratë e grekëve.
E përdori aq keq PDIU-në, duke e “ç’çamizuar”, sa ua dorëzoi të fortëve dhe njerëzve me lekë, të cilat realisht ia kanë marrë partinë dhe tani i ka mbetur vetëm vula dhe logua, se deputetët i ikën me Ramën.
Apo të ndalemi tek gazetarët.
Nuk kanë nevojë as ata të paguhen nga Athina, se aq sa thuhej se merrnin nga grekët, ua japin në një muaj politikanët e Tiranës, për të bërë propagandë për ta.
Në rrethin gazetaresk, e dinë të gjithë se shumë nga ata që bëjnë opinionin politik çdo mbrëmje në banaqet televizive, janë në borderotë e PS, PD dhe LSI.
Dhe bëhet fjalë për pagesa të frikshme, nga 10 deri në 15 mijë euro në muaj, të cilat janë para droge apo “biznesmenësh” që kalojnë nga këta të fundit tek politikanët dhe nga politikanët tek gazetarët.
Mos kërkoni emra kush janë, se i shihni çdo mbrëmje në TV!
Ndaj ky irritimi për “listat greke” duket qesharak!
Kemi “listën shqiptare”, që është ku e ku me atë greke!
Leave a Reply