Berisha nuk rresht së kërkuari “qeveri teknike”. E kërkon dhe mendon, ose edhe e beson se “vetëm me qeveri teknike mund t’ja dalë me Edi Ramën”. Në 2017 qeveria e përbashkët “teknike”, dihet si vajti. Partia Demokratike edhe pse kishte në atë “mixqeveri” ministrat e saj, humbi në mënyrë spektakolare. Kur Basha u divorcua nga Berisha, atëhere doli se “takimi në mesnatë me Edi Ramën, na qenkësh pazari dhe shkaku humbjes”.
Qeveria teknike, e cila nuk besoj se do të bëhet realitet, mbetet alibia më e fortë e Berishës, me të cilën ai do të mund të justifikojë humbjen në Majin e 2025. Por edhe sikur Edi Rama të pranonte qeveri teknike, dhe Berisha të kishte në atë qeveri ministrat e tij, a thua se do të ndryshonte gjë ?
Kjo për faktin sepse mungesa e forcës bindëse dhe bashkuese e ka dëmtuar rëndë opozitën. Po ashtu akuzat për ish-kryeministrin, sot kryetar PD-je, dhe deputetët e tij në muajt e fundit, hapja e hetimeve nga SPAK ndaj atyre që deri dje digjnin karriget, dhe na paskëshin patur goxha pasuri të “vënë me djersën e ballit”, e ka dëmtuar rëndë imazhin e demokratëve në popull. Qeveri teknike ? Po pse çfarë efekti ka një qeveri teknike në popull, kur partia që e kërkon atë, nuk ka as më të voglin rritje të kredibilitetit elektoral.
Lojërat e Berishës, janë sot pjesë e skenarëve, me të cilët ai manipulon jo vetëm të vetët, por po kërkon të bëjë “budallenj” edhe shqiptarët. Në PD, brënda asaj selie, ka kohë që po hartohen lista me emra ministrash, zv.ministrash, drejtorë drejtorish, drejtorë policie, dhe gjithfarë postesh të tjera. Berisha është mjeshtër i manipulimeve.
Ai e di fare mirë se , të fitosh ndaj Edi Ramës sot, kur Shqipëria ka arritur majat, në ekonomi, investime, fushën e integrimit europian, apo dhe mbështetjes ndërkombëtare, duhet një angazhim maksimal i një grupimi të madh specialistësh të fushave të ndryshme, gjë e cila i mungon kësaj PD-je. Po ashtu të fitosh ndaj Edi Ramës sot (pra të themi të vërtetën) kur Tirana është kthyer në kryeqendrën e takimeve nga strukturat më të rëndësishme të BE-së, është njëlloj sikur të thuash se “dua të bijën e priftit për nuse, kur ty nuk të qasin në fshat”.
Qeveria teknike, mbetet e rëndësishme kur një vend, kalon situata dhe kriza të thella politike dhe institucionale. Por kur në Shqipëri nuk ka krizë politike, por divergjenca të thella brënda kampit dhe partisë opozitare, kur mbizotëron normaliteti, dhe institucionet ligjzbatuese janë në funksionim të plotë, nuk ka nevojë për qeveri teknike. Nuk mund ti imponohesh një qeverie legjitime, një Parlamenti legjitim, me forma rruge dhe dhune, duke shkelur Kushtetutën.
Berisha do ta kërkojë qeverinë teknike, deri ditën e fundit para nisjes së fushatës, pastaj do ti kthehet me akuza Edi Ramës deri ditën e votimeve, duke justifikuar kështu edhe në 2025, humbjen e tij të re, përballë kryeministrit të Shqipërisë dhe Partisë Socialiste.
Leave a Reply