Nga Artur Ajazi
Të futur në kaushin e thellë të atyre që kanë borxh të blejnë gjithçka, për të ruajtur të paprekura pasuritë e zhvatura, një pjesë e mirë e mediave kryekëput të blera dhe të financuara nga “revolucionarët” e opozitës, kanë nisur sulmet e pështira ndaj kujdo, që po përpiqet të rindërtojë qytetet e rrënuara nga tërmeti. Në konceptin e sizmiologëve vendas dhe të huaj, tërmeti i 26 Nëntorit, ishte një hata e madhe, e cila duhet të ketë përballë angazhime të forta të shqiptarëve të bashkuar dhe jo të përçarë, të një qeverie që po lobon fuqishëm me partnerët ndërkombëtarë, por e tradhëtuar nga një ish-opozitë e papërgjegjshme. E ndërsa vendi ka hyrë në fazën më të rëndësishme të një epoke historike për rindërtimin e qyteteve dhe fshatrave të prekura nga tërmeti më i fuqishëm që ka goditur vendin në 100 vjet, eksponentë të ish-opozitës dhe treshja drejtuese e saj Meta-Lulzimi dhe Monika, kanë hapur tjetër llogore sulmi (jo ndaj qeverisë) ndaj fateve të shqiptarëve.
Duke rikarikuar mediat e tyre të blera me para pushteti, mediat e tyre mercenare, disa prej tyre me eksperiencë të gjatë “pune” në fushën e nxitjes me anë të mashtrimit, vajtuesit e pushtetit, ata që shkrygjen në turra parash dhe dehen me shampanjë kur shqiptarët gdhihen dhe ngrysen në çadra mes dimrit, po luten të “bjerë Rama”. Të vetmen gjë, që ata menduan dhe prisnin pas 26 Nëntorit, ishte rrëzimi qeverisë, kurse pezmatimin e Ramës e morën si “shenjë dobësie”. Në asnjë moment, megafonët e prishur të Lulzimit, Ilirit dhe Monikës nuk pushuan së transmetuari dhe botuari, pjesë nga orët e para të pastërmetit, të urdhëruar nga shefat që lidheshin çdo minutë me “Atë”, që priste të binte qeveria bashkë me hotelet pa leje që kishin firmosur ushtarët e tyre.
Vetëm një gjë nuk kuptoj, si mund të blesh kaq shumë media, edhe kur nuk je në pushtet ? Si mund të financosh kaq shumë redaksi lajmesh dhe pronarë (të emëruar) mediash kur nuk ke pushtet ? E vetmja gjë, mbetet të besoj se paraja e bërë dikur, e kalon malin e Korabit dhe të Tomorrit, dhe nuk paska të mbaruar. Nuk kanë të mbaruara edhe milionat që vijnë nga bizneset e “trashëguara” nga familja farefisi… apo miqtë e vjetër E ndërsa shqiptarët kanë mbi 3 javë që janë hedhur në krahët e njëri-tjetrit, për t’ju gjendur atyre që janë në vështirësi mbijetese, milionerët e pushtetit të vjetër, bëjnë duva, nuska dhe hedhin fall, edhe në faqet e gazetave dhe televizioneve që de facto, i kanë nën hyqmin e parave të tyre.
Duke akuzuar kryeministrin Rama për gjoja “çensurë, ligj antimedia, për dhunimin e fjalës së lirë”, gojështhururit e milionerëve të pushtetit të vjetër, nuk po lenë gjë pa botuar, nga shpifja deri tek akuzat nga më banale, ndaj atyre që fallxhorëve u kanë kthyer kurrizin, për tu marrë me punët në terren. Shqiptarët janë dëshmitarë të një fushate të egër denigruese mediatike, e inskenuar deri në detaje nga ata që hallexhinjve u tregojnë përralla me “burgosje qeveritarësh” kur duhej ti tregonin se janë për bashkëpunim dhe bashkim, duke u ulur në tryeza të përbashkëta pa kushte.
Opozita e vërtetë e këtij vendi, në fakt janë mediat e blera dhe ish-pushtetarët milionerë, por aq më mirë për qeverinë. Një fjalë e urtë thotë “kur nuk ke punë, luaj derën”. Të paktën këtë janë duke bërë ata, që po tallen me shqiptarët e mbetur pa shtëpi, duke u treguar “plane me 5 pika” apo dikush tjetër profka pasurie me “trashëgimi nga stërgjyshërit”e kohës së Sulltan Pekmezit.
Leave a Reply