Departamentet e Partisë Demokratike, nuk e di përse më kujtojnë gjithmonë ish-këshillat e lagjeve, ose më saktë ata që merreshin gjithë ditën me antenat e televizorëve, basetat e gjata të djemve, apo me pantallonat kaubojë. Edhe në ditët e vështira, departamentet e ish-opozitës së vjetëruar , po merren me qyfyre katundi.
Çdo 2-3 ditë del nga një “këshillar lagjeje” u jep leksione specialistëve të Ministrisë Shëndetsisë, specialistëve të Ministrisë Financave, specialistëve të Ministrisë Mbrojtjes, Brëndshme, kurse kryetari këshilltarëve Lulzimi, i jep “direktiva” edhe kryeministrit Rama.
Nga distanca, dhe nga bunkeri ku janë ndrydhur, drejtuesit e departamenteve të ish-opozitës, nuk e kanë kuptuar akoma se ku jetojnë, se çfarë ka ndodhur dhe çfarë ka nisur të ndodhë, duke treguar se janë dhe do të mbeten edhe pas virusit, ata që ishin dikur.
Drejtuesit e departamenteve të ish-opozitës së plakur, nuk e kanë kuptuar akoma se situata e jashtëzakonshme, kërkon bashkimin në një front të vetëm, dhe jo qëndrimin si sehirxhi, apo dhe daljen ndonjëherë nga ekrani për të “zbuluar” defektet e qeverisë, apo për ti treguar kryeministrit Rama se “ku e ka gabim, dhe çfarë duhet të bëjë”. Bëhen qesharakë dhe të “ditur” dështakët, dhe ata që kanë vendosur të bëhen “heronj” nga bunkeri, duke mos u dalë në ballë halleve dhe problemeve të shqiptarëve.
Dalin dhe japin deklarata “si duhet të mbrohen qytetarët”, dhe si duhet të jenë “masat dhe aktet normative të qeverisë”, ata që nuk kanë pyetur dhe nuk pyesin kurrë për hallet e shqiptarëve, por ngrohin prapanicat në vilat e tyre luksoze.
Duke e prezantuar vehten si ish-këshilltarët e lagjeve, si ata që dikur shihnin kush kishte vendosur ndonjë antenë nga Beogradi dhe Shkupi, edhe drejtuesit e departamenteve të ish-opozitës së vjetëruar, vendosin lupën dhe shohin “kush mori ndonjë qese me ndihma dhe kush ka mbetur ende pa e marrë”, ose “kush e bëri testimin për virusin dhe kush nuk e ka bërë”, dhe lloj-lloj budalliqesh të tjera.
Ka edhe më keq se kaq, tek dëgjon “specialistët” e shëndetsisë tek dalin mes 4-5 qytetarëve, dhe u tregojnë atyre si “bëhet tampon, si mbahet maska, si vishen dorezat”, duke fajësuar qeverinë edhe për gjëra të tilla.
Thirrini rrakades o drejtues të departamenteve, o këshilltarë të lagjeve, o përfaqësues të ish-opozitës së vjetëruar, ejani në vehte dhe ftillohuni, për çfarë flisni dhe çfarë nxirrni nga goja.
Shkoni atje, në frontin e luftës, pranë kolegëve tuaj, jepni shembullin personal, pastaj e shohim kush kujdeset dhe po ndihmon shqiptarët. Lërini daljet publike nga deriçkat e SHQUP-it, lërini deklaratat on-line dhe leksionet bajate se nuk ju dëgjon, njeri.
Nuk ju dëgjojnë jo vetëm ata që që janë në frontin e kësaj lufte të vështirë, por as shqiptarët që ashtu si pas tërmetit edhe sot, nuk po gjejnë tek ju njerëzit e duhur për të mbajtur gjallë shpresën, besimin, dhe dashurinë njerëzore.
Leave a Reply