ARDIT RADA/ Mandatet nuk digjen me “grup pune”, thjesht jepet dorëheqja në KQZ

Nga Ardit Rada

Partia Demokratike po synon të blejë kohë, duke hedhur në debatin politik kombëtar tezën e djegies së mandateve.

Grupi parlamentar demokrat ka votuar sot për aprovimin e këtij hapi ekstrem, duke njoftuar se të gjithë deputetët i thanë njëzëri “Po” djegies së mandatit të tyre parlamentar.

Në këtë pikë, para opinionit publik qëndrojnë ende disa paqartësi dhe aspekte të errëta, që lidhen me vendimin politik të mësipërm.

Pasi deri në këtë pikë, ashtu si del edhe nga zhvillimi i ngjarjeve të orëve të fundit, por edhe nga deklaratat zyrtare të Lulzim Bashës, PD ka aprovuar “djegien e mandateve”, duke miratuar gjithashtu edhe një grup pune për “teknikalitetet e djegies së mandateve”.

Duhet thënë se e gjithë kjo histori vazhdon të mbetet e paqartë, nëse përballet me ato që janë përcaktime ligjore që rregullojnë mbarimin e mandatit të deputetit.

Neni 71 i Kushtetutës së Republikës parashikon qartë se kur ndërpritet mandati i deputetit.

Sipas pikës së dytë të këtij neni, mandati mbaron ose është i pavlefshëm kur deputeti nuk bën betimin; kur heq dorë nga mandati; kur vërtetohet një nga kushtet e pazgjedhshmërisë ose papajtueshmërisë me ligjin; kur mbaron mandati i Kuvendit; kur mungon pa arsye mbi 6 muaj rresht në Kuvend dhe kur dënohet me vendim gjyqësor të formës së prerë për kryerjen e një krimi.

Ndërkohë Kodi Zgjedhor përcakton se mandati i deputetit, i fituar sipas neneve 162 dhe 163 të këtij Kodi, ndërpritet vetëm për shkaqet e parashikuara në nenin 71 të Kushtetutës.

Për pasojë, duke deklaruar thjesht “djegien e mandateve” dhe jo heqjen dorë në mënyrë të menjëhershme prej tyre, si përcakton neni 71 i Kushtetutës, mbeten dyshime se Partia Demokratike po fillon një tjetër bojkot të Kuvendit, kësaj rradhe duke i vënë një emër të ri: atë të djegies së mandateve.

Të djegësh mandatet me deklarata, por pa dhënë dorëheqjen në KQZ, do të thotë të marrësh edhe 6 muaj rrogën si deputet pa shkuar asnjë ditë në parlament.

E parë kështu, kjo nismë e fundit e PD tingëllon më shumë si një akt force për të shtyrë drejt një negociate, ndoshta edhe me përfshirjen e ndërkombëtarëve, sesa si një gjest i sinqertë dhe i pakthyeshëm dorëheqjeje kolektive nga Parlamenti.(javanews)