Tirana ndonjëherë të befason edhe me faunën e saj urbane: mu në qendër, te muri i Muzeut të Gjetheve, gjetëm dhe fotografuam këtë gjallesë mutante me trembëdhjetë palë këmbë – që potencialisht mund të përmbysë konceptin që ka sot shkenca për insektet dhe për artropodët në përgjithësi dhe të imponojë rishikimin e taksonomive përkatëse.
Krijesa në fjalë, që i ndan disa karakteristika me brumbullin a buburrecin – te vërehet këtu forma karakteristike e toraksit – megjithatë spikat për numrin e ekzagjeruar të këmbëve; njëzet e gjashtë (ose njëzet e tetë – nëse numërojmë si të tilla çiftin e parë, që mund të jenë edhe mandibula ose antena). Një aberracion i tillë nuk ndeshet në natyrë – përveçse te shumëkëmbëshit, që kanë një morfologji tjetër të trupit. Gjasat janë që gjëkafsha në fjalë të jetë produkt i një mutacioni gjenetik unik. Çernobyli mund të vijë këtu në vështrim si shkak i mundshëm, ose gruri serb, ose uraniumi i shuar i predhave të NATO-s, ose shërbimi radiografik i klinikës dentare Hyka aty pranë.
Vëzhguesit të mprehtë nuk do t’i shpëtojë edhe se, ndryshe nga ç’është rasti me insektet e mirëfillta, këtij që gjetëm te muri i Muzeut vetëm një palë këmbë i artikulohen në toraks, ndërsa pjesa tjetër në abdomen, teksa insektit këmbët i dalin të gjitha nga toraksi. Kjo karakteristikë mund ta afrojë gjallesën tonë me izopodët dhe pikërisht me “Armadillidium vulgare”, që siç dihet botërisht, i përket familjes së krustaceanëve.
Sipas rregullave në fuqi, nxituam për ta raportuar specien e re pranë Muzeut të Shkencave të Natyrës dhe për të sugjeruar emrin latin “tartabicus domus foliorum”, por pastaj u vonuam rrugës për ca kafe me entomologë të rënë nga vafti, dhe e humbëm fillin.
Leave a Reply