Lulzim Basha miratoi në mbledhjen e fundit të Këshillit Kombëtar të PD ngritjen e “Aleancës së qytetarëve” që do të marrin në dorë mbrojtjen e demokracisë.
Këto “komitete”, sipas platformës së miratuar në forumin më të lartë drejtues demokrat për periudhën mes dy Kuvendeve, do të ngrihen në 61 bashkitë e vendit dhe do të përbëhen nga intelektualë vendas, nga veprimtarë të PD dhe njerëz që “duan demokracinë”.
Pra kërkohet ngritja e një strukture paralele, me njerëz të mbledhur andej këndej, që nën drejtimin e krerëve të degëve të PD në rrethe të marrin përsipër, jashtë strukturave ligjore të shtetit shqiptar, të “mbrojnë” demokracinë.
Që në emërtesë dhe përbërje kjo strukturë na kujton ditët e vështira të marsit të vitit 1997, kur përmes një qarkoreje të lëshuar nga PD për të gjitha degët e kësaj partie në rrethe, kërkohej mobilizimi i të gjithë militantëve që “donin Shqipërinë”, për të shkuar dhe luftuar në Jug.
Dhe në atë qarkore të PD, ishte ngarkuar Shaban Memia me zbatimin e kësaj detyre, kërkohej që të rekrutoheshin intelektualë, militantë dhe njerëz që “duan demokracinë”, e cila “rrezikohej nga komunistët që kanë marrë Jugun e vendit”.
Madje, u shpërndanë me firmë dhe me vulë dhe armët personale me të cilat u pajisën paramilitarët, dhe erdhën në Sauk ku u “përgatitën” dy tre ditë për të luftuar në Jug të vendit, dhe mbrojtur sovranitetin e shtetit nga rreziku i “pushtimit komunist”.
Historia e tyre dihet tashmë.
Ata shkuan të rreshtuar dhe të transportuar nga makinat ushtarake për të luftuar në Përmet, Vlorë, Gjirokastër, Fier dhe zonat përreth, dhe u kthyen më këmbë malit, pasi hodhën armët, të lodhur dhe tmerruar në Tiranë.
Ata që ishin me shumë fat morën pasaporta diplomatike dhe na nxorën bojën në të gjithë Europën, ndërsa të tjerët mbetën në Shqipëri dhe ende kujtojnë me neveri dhe frikë atë kohë kur nën drejtimin e Sali Berishës president, çmenduria ishte kthyer në institucion.
Ndërsa vetë Berisha dhe drejtuesit e asaj kohe që ishin rekrutuesit dhe urdhëruesit e tyre, falë dhe një drejtësie të korruptuar dhe shërbëtore të politikës, vijojnë dhe sot e kësaj dite t’i japin tonin politikës, madje dhe të guxojnë të ngrenë struktura të ngjashme me ’97-tën, për destabilitetin e vendit.
Pavarësisht emërtesës, i njejti format është dhe struktura që kërkon të ngrejë Lulzim Basha, pas të cilit qëndron Sali Berisha, në 61 bashkitë e vendit për të prishur dhe shkatërruar zgjedhjet e 30 qershorit.
Ndërsa Kodi Penal e ka të përcaktuar qartë se sa vite burg bëjnë ata që cënojnë zgjedhjet, por dhe duke parë kërcënimin e SHBA dhe BE për të gjithë këtë skenar dhune që po tentojnë të përgatisin liderët e opozitës, nuk besojmë se ndokush kërkon të rrezikojë më 30 qershor, vetëm pse Basha, Kryemadhi, Berisha por dhe Meta nguten të vijnë në qeverisje.
Aq më tepër që askush nuk e shkon nëpër mend që të përsërisë fatin e paramilitarëve të Berishës të vitit 1997 që shkuan dhe luftuan në Jug të vendit, dhe patën fatin me vete që u rikthyen pranë familjeve të tyre.
Nuk do të ishte keq që të pyeteshin sëpaku ata paramiltarë që shkuan të luftonin në jug atëherë dhe u kthyen, përpara se të ndërmarrin akte dhune më 30 qershor. Mësimi nga historia vlen
Leave a Reply