Nga Adriatik Doçi
Nuk është krim të jesh i/e pasur, por vetëm rruga që zgjedh për t’u bërë i/e tillë. Në vendet normale, më të pasurit janë ata që krijojnë, prodhojnë, ata kanë talente apo dhunti të caktuara, si biznesmenët e suksesshëm, sportistët, aktorët, shpikësit etj.
Në Shqipëri janë politikanët dhe gjyqtarët, me ‘talentin’ e vetëm për të shumëfishuar pasurinë, pa prodhuar asgjë, por vetëm me paga shteti fikse.
Kur Monika Kryemadhi hyri për herë të parë në politikë, gati tre dekada më parë, si pasuri kishte vetëm opingat. Më vonë, i kanë lënë trashëgim prindërit 2/6 e dy apartamenteve, afërsisht 2-3 dhoma gjithsej.
Gjatë lundrimit të tyre në politikën shqiptare, Monika Kryemadhi dhe bashkëshorti i saj Ilir Meta, kanë deklaruar si të ardhura vetëm pagat e tyre shtetërore, sipas pozicioneve që kanë pasur. Nuk figuron asnjë qindarkë nga ndonjë biznes apo veprimtari jashtë funksioneve publike.
Ndonëse çifti presidencial ka mbajtur funksione të larta, pagat në Shqipëri kanë një tavan të caktuar, të mjaftueshme vetëm për të siguruar vetëm ushqimin, veshjet, sigurimin e një banese, ujin, energjinë elektrike, transportin, shëndetin, komunikimin, argëtimin, arsimin, pushimet etj.
Banesat e dyta dhe të treta, shkollimi i fëmijëve në Angli, frekuentimi i restoranteve dhe hoteleve luksoze, ndërhyrjet e kushtueshme estetike, veshjet e kushtueshme etj., mund të përballohen vetëm të ardhura të tjera shtesë.
Çfarë ka ndodhur? Me këtë status, me këto të ardhura dhe shpenzime, Monika Kryemadhi ka sot në pronësi një pallat në Tiranë, ku vetëm nga shitja e apartamenteve të cilit ka fituar 890 mijë euro deri më tani. Monika deklaron edhe një vilë në Gjirin e Lalzit, me 11 WC, një posaçërisht për macen.
Kurrë nuk e ka deklaruar vlerën e vilës. Rreth saj ka vetëm hamendësime që variojnë nga 500 mijë deri në 2 milionë euro. Zonja e parë deklaron edhe një apartament me vlerë 400 mijë euro në Tiranë. Dhe kjo është vetëm një pjesë së pasurisë së deklaruar me dokumente, e theksojmë ‘pasurisë së deklaruar’.
Monika Kryemadhi ka një sagë me justifikime, manovra me kredi, dhurata, borxhe, falje tokash etj., por kjo është e vërteta e thjeshtë e pasurisë së saj:
Një pasuri miliona euro me vetëm dy paga dhe fëmijët me shkollë në Angli. Dy janë rrugët e pasurimit:
Ose Monika Kryemadhi është vërtetë një magjistare dhe e ka nxjerrë pallatin nga filxhani, ose Monika Kryemadhi është një politikane thellësisht e korruptuar. Ndajeni vetë. Ndoshta do ta ndajë edhe SPAK-u.
Leave a Reply