Ish ministri i drejtësisë Ylli Manjani ka reaguar pas vendimit të presidentit Meta i cili nuk dekretoi ligjin për shembjen e Teatrit Kombëtar dhe ndërtimit të një të riu.
Në një shënim në facebook Manjani ka ftuar ligjvënësit shqiptarë që të lexojnë siç duhet mesazhin e Metës për Teatrin.
“Helmin që deputetët dhe drejtuesit e institucioneve politike në vend kanë me njëri-tjetrin le ta shprehin, por në këtë rast vlen vetëm ARSYEJA dhe ARGUMENTI në kushte tepër të veçanta ku gjendet shteti”- shprehet Manjani.
Reagimi i plotë:
Uroj që deputetët të vendosin arsyen mbi emocionin politik dhe ta lexojnë siç duhet mesazhin e Presidentit të Republikës, me rastin e kthimit të të ashtuquajturin ligji për Teatrin Kombëtar!
Vetëm me arsye të ftohtë mund të tejkalohet kjo situatë shumë delikate, e vështirë sa më s’ka!
Nuk vlen asgjë çelja e debatit me deklarata koti, që jemi mësuar të dëgjojmë.
Helmin që deputetët dhe drejtuesit e institucioneve politike në vend kanë me njëri-tjetrin le ta shprehin, por në këtë rast vlen vetëm ARSYEJA dhe ARGUMENTI në kushte tepër të veçanta ku gjendet shteti.
Mbi të gjitha, fakti që nuk ka një gjykatë që ta vlerësojë kushtetutshmërinë e atij ligji, është arsye e mjaftueshme për t’u tërhequr nga kjo nismë.
Janë shumë njerëz që kanë të drejtën e ligjit dhe të zotit të ankohen ndaj qeverisë, por nuk kanë se ku.
Nuk mund të mohohet në asnjë rrethanë e drejta për t’u ankuar e gjykuar nga një gjykatë kompetente!
Të gjitha konventat kuadër e parashikojnë këtë detyrim të çdo shteti, pavarësisht formës apo llojit të rregjimit politik.
Ndaj uroj të triumfojë logjika, në këto momente të vështira, të pa jetuara më parë në historinë e shtetit tonë modest!
Le të shpresojmë!
Leave a Reply