Anxhela Ruçi/
Në 15 mars të këtij viti, në Parlamentin e Shqipërisë u mbajt mocioni me debat me kryeministrin thirrur nga opozita për ndihmën ekonomike.
Ndër deputetët që u ngjitën në foltore ishte dhe deputetja e partisë Lëvizja Socialiste për Integrim, Kejdi Mehmetaj.
Gjatë fjalës së saj, Mehmetaj deklaroi se: “Të gjitha shifrat zyrtare të ardhura nga çdo institucion që i mat ato, thonë se sot kemi nivelin me te lartë të papunësisë që Shqipëria ka parë ndonjëherë qysh nga vitet 1990.”
Duke qenë se Shërbimi Kombëtar i Punës (SHKP) është institucioni përgjegjës për çështjet e punësimit, “Faktoje” kërkoi shifrat e papunësisë për 28 vite, për të parë nëse deklarata e deputetes korrespondon me të dhënat zyrtare.
Gjithashtu, e njëjta kërkesë për nivelin e papunësisë, u dërgua dhe tek Instituti Statistikave (INSTAT).
Në të dhënat statistikore të vëna në dispozicion nga SHKP, rezulton se numri i papunësisë në vitin 2017 ishte 13.6 %, afërsisht i njëjti nivel si në vitin 2006, 2007, 2008, 2009, 2010 dhe 2011.
Ndërsa shifrat e INSTAT, të përpunuar nga Anketat e Forcës së Punës tregojnë se në vitin 2017, niveli i papunësisë ka qenë 14.1 %.
Sipas Shërbimit Kombëtar të Punësimit niveli më lartë i papunësisë është regjistruar në vitin 1993 me 26.4%, duke hedhur kështu poshtë deklaratën e Kejdi Mehmetaj se në ditët e sotme është regjistruar niveli më i lartë i papunësisë.
Vitin 1996 shënon vitin me më pak të papunë, shifër që arrin në 10.7 %. Duke krahasuar deklaratën e deputetes së LSI-së Kejdi Mehmetaj, me shifrat e vëna në dispozicion nga SHKP dhe INSTAT, “Faktoje” këtë deklaratë bërë nga foltorja e Parlamentit do ta klasifikojë GËNJESHTËR.
*Shënim. Për vitet 1990 dhe 1991 nuk ka të dhëna statistikore të regjistruara për nivelin e papunësisë.
Leave a Reply