Ka një debat të madh për Reformën në Drejtësi, nëse vërtet ajo do të përfundojë me sukses apo do të vazhdojë të ecë me ritme të ngadalta, apo më keq akoma, do të bllokohet nga klasa politike shqiptare, që për hir të së vërtetës duket në një aleancë të plotë kundër saj.
Për të arritur në një përgjigje, së pari, duhet të përcaktojmë objektivin dhe qëllimin e kësaj reforme. Gjë të cilën nuk e kemi bërë deri më tani, pasi duke parë urinë e qytetarëve shqiptarë për drejtësi, e cila u ka munguar në këto 25 vite, shpeshherë është krijuar një padurim apo kakofoni mbi qëllimin dhe arritjen e këtij qëllimi.
E megjithatë, përtej çdo skepticizmi, Reforma në Drejtësi mund të konsiderohet si një proces i suksesshëm deri më tani.
Duke qenë se një nga problematikat më të mëdha të drejtësisë shqiptare ka qenë korrupsioni galopant në këtë pushtet, Reforma në Drejtësi ka arritur të bëjë pastërtinë e figurës së gjyqtarëve apo prokurorëve. Procesi i vettingut sapo ka filluar, shumë nga magjistratët shqiptarë kanë dhënë dorëheqjen dhe procesi duket në rrugë të mbarë.
Rasti i largimit të anëtarit të Gjykatës Kushtetuese dhe nisja e ndjekjes penale kundër tij për shkak se nuk arriti dot të justifikonte pasurinë, e dëshmon më së miri këtë gjë.
Në këtë kuptim, Reforma ka arritur në një pikë të suksesshme. Askush më parë nuk do ta mendonte se e gjitha trupa gjyqësore shqiptare do të futej në një kontroll të tillë pastërtie dhe kjo është padyshim meritë e Reformës në Drejtësi.
Atëherë përse ekziston një frymë skepticizmi për efektet e saj dhe përfundimin me sukses?
Sepse opinioni publik shqiptar ka një pritshmëri tjetër për sa i përket Reformës dhe nuk është shumë i interesuar se çfarë efektesh ka ajo brenda pushtetit gjyqësor, por kërkon arrestime të politikanëve dhe pushtetarëve shqiptarë, duke qenë se pritshmëritë janë krijuar në këtë drejtim për sa i përket Reformës.
Mirëpo, edhe pse ka një rezistencë të fortë të klasës politike shqiptare kundër saj, me insistimin e ndërkombëtarëve procesi i ndërtimit të organeve të reja të drejtësisë ka filluar dhe shumë shpejt do të ngrihen organet hetuese si SPAK dhe Byroja e Hetimit Kombëtar, që do të merren posaçërisht me këto lloj hetimesh.
Prandaj, të presësh sot pa u ndërtuar këto organe, hetimin e politikanëve të lartë është një padurim i tepruar.
E megjithatë, fryma e Reformës në Drejtësi perceptohet edhe te politika shqiptare. Duket qartë se ka një klimë të tensionuar të saj për efektet që do të japë ajo në sistemin politik shqiptar. Është krijuar një lloj “terrori” politik për shkak se për herë të parë në këto 25 vite organet e drejtësisë po i ikin nga duart.
Po të futësh këtu edhe arrestimet dhe hetimet e fundit të disa pushtetarëve, atëherë klima ndihet e plotë. Edhe pse këta pushtetarë deri më tani janë vetëm të një krahu politik dhe prova e prokurorisë është të na dëshmojë të kundërtën, ka një tentativë, të paktën si vullnet për të kryer hetime të rëndësishme për shumë nga çështjet që janë përfolur gjatë tranzicionit politik shqiptar.
Asnjëherë më parë hetime të tilla nuk ishin përfolur ndonjëherë nga drejtësia e kaluar, e jo më të inicioheshin nga prokuroria. Në këtë kuptim, Reforma në Drejtësi, deri më tani, mund të konsiderohet e suksesshme. Pritshmëritë janë të larta, por duhet të jenë gjithmonë në raport me kontekstin dhe kohën, në të kundërt, këto pritshmëri do të prishin dhe ato arritje që Reforma ka deri më tani.
Leave a Reply