Këtu pak më poshtë kalonte rruga për te axhensia e transportit, ku në një fillim shtatori te vitit 1987, familjarët dhe disa shokë përcollën djaloshin e bukur për në Universitet…
Dhe ja sot, ku po e presim atë të derdhur në Bronx dhe në memorien e kombit, si ikona tek e cila ne fillim te viteve 90-të morën guximin dhe të drejtën për të ëndërruar mijëra studentë, të rinj e të reja, burra e gra të Shqipërisë së asaj kohe të gjynjëzuar nga diktatura.
Një urim mirë se ardhje buron nga zemrat tona për Azem Hajdarin, besimtarin e madh të vlerave të Tropojës, vlerave të lirisë, besimtarin e madh të Zotit, besimtarin e Dervishit të Luzhës!
Për rreth 50 vite nëntoka e shpirtit të shqiptarëve u mbush së thelli me vuajtje e persekutime të një rregjimi ç’njerëzor. Ajo priste një shpërthim vullkani, duke dëshmuar jo vetëm padurimin ndaj padrejtësive, por sidomos shpirtin e madh të etur për demokraci.
Dhe ai shpërthim vullkani, që dogji atë sistem vuajtjesh, terrori e mjerimi dhe lindi një sistem të të drejtave dhe lirive njerëzore, ishte Azem Hajdari.
Guximi i madh që buronte nga zemra tij, ëndrra dhe dëshira e pashuar për liri, e vunë atë në krye të lëvizjes së madhe studentore të dhjetorit 1990, që do të ishte dhe dita e kthesës për fatin e Shqipërisë dhe shqiptarëve.
Mijërat e protestuesve për herë të parë u ushqyen me guxim nga shpirti i Azemit tonë.
Prandaj me plot bindje e them, se ne tropojanët krenohemi me veprën e pavdekshme të Azem Hajdarit.
Ndaj në këtë ditë, ndihemi krenarë që po kryejmë këtë obligim fisnik të nderimit të figurës që dha jetën për vlerat që pasqyron Malësisa e Gjakovës, guximi e lufta për liri, dhe sot po ringjallet për të qënë përjetë me ne, përjetë pranë nesh, për të na inspiruar siç na inspiroi dikur, edhe sot në këto ditë të vështira për demokracinë dhe fatet e vendit.
Azem, ti je gjallë këtu me ne! Faleminderit që u dhe mundësinë shqiptarëve të ëndërrojnë të lirë, që i dhe brezit tonë mundësinë të bëjmë realitet ëndrrën për të jetuar në demokraci!
Mirënjohja jonë e pakufijshme nuk do të mundet kurrë të barazojë sakrificën tënde sublime për ne, për Shqipërinë, por ne zotohemi që përmes veprave si kjo përmendore madhështore sot, do të mbajmë gjallë veprën tënde të përjetshme të guximit.
Dhe sigurisht që në këtë ditë të veçantë, një falenderim i mbushur me mirënjohje dhe krenari buron nga thellësia e qënies sonë për burrin e madh të Tropojës dhe kombit shqiptar, Prof.Dr. Sali Berisha, si njeriu që i dha frymë ngritjes së demokracisë dhe punoi e punon çdo ditë, çdo orë, çdo çast për ndërtimin e Shqipërisë europiane.
Faleminderit doktor për gjithçka ke bërë dhe vazhdon të bësh për Tropojën, Shqipërinë, për Kosovën dhe kombin!
Të nderuar pjesëmarrës!
Nga sheshi Azem Hajdari, sot dua të falënderoj ata burra dhe gra, në Shqipëri dhe diasporë, që iu përgjigjën thirrjes së Bashkisë Tropojë për të kontribuar në realizimin e kësaj vepre të përjetshme!
Një falenderim të veçantë kam për kryetarin e Partisë Demokratike të Shqipërisë, Z.Lulzim Basha, për kontributin dhe përkushtimin e jashtëzakonshëm!
Falenderoj gjithashtu artistët e daltës, që skalitën këtë përmendore, e cila driton kaq madhështore në krahët e malit tonë të shenjtë, Shkëlzenit!
Nder përjetë Azem Hajdarit dhe veprës së tij të ndritur!
*Autori është kryetar i Bashkisë së Tropojës. Pjesë nga fjalimi në përurimin e shtatores së Azem Hajdarit
Leave a Reply