Populli ka rezerva me qeverisjen e këtyre 8 viteve.
Si çdo qeveri që kalon jo një por dy mandate në qeverisje tashmë është e sprovuar dhe afërmendsh që cilido i rritur, i cili do të votojë me 25 prill, e di tashmë se çfarë do të bëjë me votën që do të hedhë në kutinë e votimit.
Ose do të rikonfirmojë me një mandat të tretë këtë qeveri, ose do të rikthejë një PD të ndryshme nga ajo që ka patur më herët qeverisjen.
Probabilitetet, sondazhet dhe konspiracionet, po ja lë ekspertëve të tyre sepse nuk është asnjëra fushë ku kam siguri të shprehem. Sot u zgjuam me zhurmë në rrjet, e rrjeti në fakt bën zhurmë për çdo gjë, nga një ngjarje madhore politike deri tek thashethemet e emisoneve televizive.
Sot titujve të librave shqip, iu shtua një titull “Misioni im”, i Lulzim Bashës.
Si studente e profilit, lumturohem kur shoh botime të reja, shqip, ndonëse ende nuk e kam lexuar ndaj nuk ju servir dot një recensë. Ndoqa videon e promovimit përballë studentëve, me shumë vëmendje por nuk arrita dot të kuptoj.
Kam ndjekur disa promovime librash por ky ishte i një lloji të veçantë, pasi më dukej sikur as vetë autori nuk ishte fort i kthjellët se çfarë do të gjente lexuesi kur të hapte kopertinën me një foto portret të liderit të selisë blu, nejse mos e gjykoni kurrë librin nga kopertina.
Misioni i Bashës ishte të bënte opozitë, ndaj po ju rikujtoj edhe njëherë ndonëse kam besim tek kujtesa e kujtdo, që opozita me Bashën në krye dogji mandatet dhe la atë pjesë të popullit, që ndjehej jo i përfaqësuar nga kjo qeveri duke nisur nga elektorati i PD e deri tek njerëzit që nuk kanë lidhje me politikën, por kërkojnë të përfaqësohen nga të zgjedhurit për në parlament, pa përfaqësim.
Mision i pamundur; Basha nuk diti të udhëheqë opozitën në parlament. Me kaq po e lë sepse sado të meremi me meme, gafa, lapsuse, nga matematika deri tek Musine Kokalari, asgjë nuk i ka kushtuar më shtrenjtë reputacionit të opozitës se sa vendimi për të mos bërë atë për të cilën në fakt janë destinuar të funksioniojnë, politikë, në rastin konkret, opozitë. Mos e gjykoni kurrë libin nga kopertina, por nga titulli ia vlen të krijoni një ide.
Misioni i tij është në fakt mision i pamundur, e ky fakt i kushton vetëm shqiptarëve, të cilët duhet të zgjedhin mes dy të këqijave në zgjedhjet e 25 prillit, ku opozita u fut në garë ndonëse u përbetua se nuk do të bëhej kurrë pjesë e zgjedhjeve me Ramën kryeministër.
Leave a Reply